ᐱᑕᓂ ᓯᑳᑦ ᐱᓕᕆᐊᒃᓴᓕᕆᔨ ᖁᐊᔭᐅᑎᑦ ᓇᒻᒥᓂᖃᖅᑐᓄᑦ, ᐋᖅᑭᒍᑎᒃᓴᓄᑦ-ᑐᕌᒐᓕᖕᓂᑦ ᐱᓕᔨᒻᒪᕆᐅᕙᒃᑐᖅ ᐱᔨᑦᓯᖅᑕᐅᔪᒪᔪᑦ ᐱᒋᐊᓕᖏᓐᓂᒃ ᑎᑭᑦᑎᖁᓪᓗᒋᑦ. ᐱᓕᕆᖃᑦᑕᖅᓯᒪᔪᖅ ᑐᙵᕕᖃᕐᓂᕐᒥᒃ ᐱᔨᑦᓯᓂᒃᑯᑦ-ᐱᔨᑦᓯᖅᑕᐅᑎᑦᓯᓂᒃᑯᑦ ᓄᓇᓕᖕᓂ ᐱᕙᓪᓕᐊᑎᑦᓯᓂᕐᒥᑦ ᐃᒃᐱᒋᑦᑎᐊᓯᓐᓇᖅᑐᒋᑦ ᐃᓗᓕᖏᑦ ᐊᒻᒪᓗ ᓂᕈᐊᖅᑕᐅᓯᒪᔪᑎᒍᑦ ᐊᒃᑐᐊᓂᖃᕈᑎᖏᑦ. ᐱᑕᓂ ᐊᔪᖏᓐᓂᓕᒃ ᐱᓕᕆᖃᑎᖃᑦᓯᐊᓂᕐᒥᑦ ᐊᔾᔨᒌᖏᑦᑐᓂᒃ ᐃᓄᖕᓂᑦ ᐃᓘᓐᓇᖏᓐᓄᑦ ᐊᑲᐅᓈᖅᑐᒥ-ᐋᔩᖃᑎᒌᒍᑕᐅᓯᒪᔪᒥ ᐅᐸᓗᖓᐃᑦᑎᐊᖅᓯᒪᔪᒥᓗ ᐱᔭᕇᕈᑎᖃᖁᓪᓗᒋᑦ. ᑐᙵᓇᖅᑐᒥ, ᐃᑲᔪᖅᓱᐃᔪᒥ ᐃᒃᐱᒍᓱᑦᑎᑦᑎᒋᐊᖅ ᖁᕕᐊᒋᔭᓕᒃ ᐱᓕᕆᖃᑎᒋᔭᖏᓐᓂᒃ ᐊᒻᒪᓗ ᐱᔨᑦᓯᖅᑕᐅᔪᓂᒃ, ᑐᑭᓯᓯᒪᓪᓗᒍ ᐃᓄᐃᑦ ᑲᑎᑐᐊᕐᒪᑕ ᐊᓯᔾᔩᔪᓐᓇᕐᓂᖏᑦ, ᒥᑭᒃᑲᓗᐊᖅᐸᑦ ᐊᖏᔪᐊᓘᑉᐸᓘᓐᓃᑦ ᐊᓯᔾᔨᖅᓯᓂᐅᔪᖅ.

ᐃᓅᓂᑰᓪᓗᓂ ᐱᕈᖅᓴᓪᓗᓂᓗ ᓂᐅ ᐳᕋᓐᓯᕕᒃᒥ, ᐱᑕᓂ ᐊᕐᕌᒍᓂ ᖁᓕᓂ ᑲᓇᑕᐅᑉ ᐱᖓᖕᓇᖓᓃᓐᓂᑰᕗᖅ, ᓄᓇᕗᒨᓚᐅᕋᓂ, ᓄᓇᕗᑦ ᐊᖏᕐᕋᕆᓕᖅᓯᒪᖕᒪᒍ. ᑐᑭᒧᐊᒃᑎᑦᓯᔨᐅᑉ ᑐᖏᓕᕆᓪᓗᓂᐅᒃ ᐃᓅᓯᓕᕆᓂᕐᒧᑦ ᕿᑭᖅᑕᓂᒃᑯᓐᓂ (QIA), ᐱᑕᓂ ᑲᒪᒋᔭᖃᖃᑦᑕᓚᐅᖅᑐᖅ ᐱᖓᓱᓂ ᐱᓕᕆᐊᒃᓴᓄᑦ ᑲᒪᔨᐅᔪᓂᒃ ᐊᒻᒪᓗ 12 ᐱᓕᕆᐊᒃᓴᓄᑦ ᑐᖅᑲᑕᕐᕕᐅᔪᓂᑦ ᐃᓅᓯᓕᕆᓂᕐᒨᖓᔪᑦ ᐃᓕᖅᑯᓯᓕᕆᓂᕐᒧᓪᓗ ᑲᔪᓯᑎᑕᐅᖃᑦᑕᑎᓪᓗᒋᑦ ᐃᓄᖕᓄᑦ ᑐᕌᖅᑐᑦ ᕿᑭᖅᑕᓂ ᓄᓇᓕᐅᔪᓂ 13-ᓂᒃ ᐊᒻᒪᓗ ᑲᓇᑕᐅᑉ ᐃᓗᐊᓂ. ᐱᑕᓂ ᐋᖅᑭᒃᓱᐃᔨᒻᒪᕆᐅᓯᒪᔪᖅ ᐃᓂᓪᓚᑦᑎᕆᔨᐅᓪᓗᓂᓗ ᐃᓅᓯᓕᕆᔨᒃᑯᑦ ᕿᑭᖅᑕᓃᒃᑯᓐᓂ ᐱᕈᕐᓂᖓᓄᑦ ᐋᖅᑭᒋᐊᖅᑕᐅᒃᑲᓐᓂᕈᑎᖓᓄᓪᓗ. ᑲᔪᓯᑎᑦᑎᓚᐅᖅᑐᖅ ᐋᖅᑭᒃᓯᒪᓂᖓᑕ ᐊᓯᔾᔨᖅᓱᖅᑕᐅᓂᖓᓂᒃ ᐅᔾᔨᖅᓱᐊᕆᓪᓗᒍ ᑲᒪᒋᓪᓗᒍᓗ ᑲᔪᓯᑦᑎᐊᕐᒪᖔᓪᓗ ᐊᒻᒪᓗ ᑲᔪᓯᑦᑎᐊᕐᒪᖔᑕ ᐱᓕᕆᐊᒃᓴᐅᑎᑕᐅᕙᒃᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᐃᓄᖕᓅᖓᔪᑦ ᑲᒪᒋᖃᑦᑕᕐᓂᐊᖅᑕᖏᑦ ᑐᓴᐅᒪᔭᐅᒃᑲᓐᓂᖁᓪᓗᒋᓪᓗ ᐅᖃᐅᓯᐅᖃᑦᑕᕐᓗᑎᒃ ᐊᑑᑎᖃᑦᓯᐊᕐᓂᖏᑦ.

ᐊᕐᕌᒍᑦ ᖁᓕᑦ ᐅᖓᑖᓂ ᓯᕗᓕᖃᑦᑕᕐᓂᑰᓪᓗᓂ ᐊᑐᐊᒐᓕᕆᓂᕐᒥᑦ ᐱᓕᕆᐊᒃᓴᐅᔪᓄᓪᓗ, ᐱᑕᓂ ᐃᑲᔫᑎᖃᖅᓯᒪᓪᓚᕆᑦᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᕿᒪᐃᕕᒋᓪᓗᒋᑦ ᐃᖅᑲᐅᒪᓇᕈᑕᐅᔾᔪᑎᓂᒃ ᓲᕐᓗ ᕿᑭᖅᑕᓂᒃᑯᑦ ᓱᓕᔪᓂ ᑭᒡᓕᓯᓂᐊᖅᑎᒃᑯᑦ, ᐃᓅᓯᓕᕆᔨᒃᑯᑦ ᐃᓕᖅᑯᓯᓕᕆᓂᕐᒧᓪᓗ ᐱᓕᕆᐊᒃᓴᐅᔪᑦ (ᐱᕚᓪᓕᕈᑎᑦ ᐱᓕᕆᐊᒃᓴᑦ, ᓴᐃᒻᒪᖃᑎᒌᖕᓂᖅ, ᐊᐃᑦᑑᓯᐊᑦ ᐃᑲᔫᑎᒃᓴᓪᓗ), ᓄᓇᓕᖕᓂᓗ ᑐᙵᕕᖃᖅᑐᑦ ᐃᓅᓯᓕᕆᓂᒃᑯᑦ ᑮᓇᐅᔭᓕᐅᕈᑎᒃᓴᑦ ᖃᐅᔨᓴᖅᑕᐅᓂᖏᑦ, ᐊᒻᒪᓗ ᓄᕙᒡᔪᐊᕐᓇᖅ 19 ᑐᐊᕕᕐᓇᖅᑐᒃᑯᑦ ᐃᑲᔪᖅᑕᐅᔾᔪᑎᒃᓴᑦ ᑲᔪᓯᑎᑕᐅᓂᕆᔭᖏᑦ. ᐊᕐᕌᒍᒐᓴᖕᓄᑦᑕᐅᖅ ᓯᕗᓕᖃᑕᐅᖃᑦᑕᖅᓯᒪᕗᖅ ᕿᑭᖅᑕᓂᒃᑯᑦ ᐱᓕᕆᔭᖏᓐᓄᑦ ᓴᖅᑭᑦᑎᖁᓪᓗᒋᑦ ᐃᓄᒃᑎᑑᖓᔪᓂᒃ ᐸᐃᑉᐹᒃᑰᖓᓕᖅᑎᕆᓂᕐᒥᑦ ᐅᖃᓕᒫᕆᐅᖅᓴᔾᔪᑎᒃᓴᓪᓗ ᐃᓄᒃᑎᑑᕆᐅᖅᐸᓪᓕᐊᔪᓄᑦ ᓄᑕᖅᑲᓄᑦ.

ᐱᑕᓂ ᖁᕝᕙᓯᑦᑐᒥᒃ ᐸᐃᑉᐹᑖᖅᓯᒪᔪᖅ ᓄᓇᓕᖕᓂ ᐱᕙᓪᓕᐊᑎᑦᑎᓂᕐᒨᖓᔪᒥᒃ ᑲᐃᑉ ᐳᕆᑕᓐ ᐃᓕᓐᓂᐊᕐᑯᒡᔪᐊᖓᓐᓂᑦ ᐊᒻᒪᓗ ᑳᑦᓯᓘᓂᕋᖅᑕᒥᒃ ᓄᓇᕐᔪᐊᕐᒥ ᐃᓕᓐᓂᐊᕈᑕᐅᓲᓂᒃ ᐊᒻᒪᓗ ᐃᓄᓕᕆᓂᕐᒥᑦ ᕙᓐᑰᕙ ᔪᓃᕗᓯᑎᖓᓐᓂ. ᐱᑕᓂ ᓄᓇᓕᖕᓂ ᐃᓚᓕᐅᑎᓯᒪᔪᖅ, ᐊᔾᔨᒌᖏᑦᑐᓂ ᑲᑎᒪᔨᐅᕕᖕᓃᖃᑦᑕᖅᓯᒪᓪᓗᓂ ᒪᑯᓄᖓ ᐱᓕᕆᔪᓄᑦ ᒐᕙᒪᓕᕆᓂᕐᒧᑦ, ᐃᒡᓗᓕᕆᓂᖅ, ᓄᓇᓕᖕᓂᓗ ᐱᕙᓪᓕᐊᑎᑦᑎᓂᕐᒧᑦ. ᑲᑎᒪᔨᕈᖅᑎᑦᑎᔪᔪᖅ ᐃᓕᓐᓂᐊᕐᕕᒡᔪᐊᑉ ᓯᓚᑖᓂ (ᕙᓐᑰᕙ ᐊᐃᓚᓐ ᐃᓕᓐᓂᐊᕐᕕᒡᔪᐊᖓᓐᓂ) ᐊᒻᒪᓗ ᐊᑯᓕᕐᒥᐅᑦ ᑮᓇᐅᔭᓕᐅᕋᓱᒃᑎᐅᖏᑦᑐᑦ ᐃᒡᓗᓕᕆᔨᖏᓐᓄᑦ (ᑕᐃᔅᓱᒪᓂ ᐊᑎᖃᔪᔪᑦ Iqaluit Action Lab). ᐊᑯᓂᓗ ᑲᑎᒪᔨᐅᓂᑰᕗᖅ ᑮᓇᐅᔭᓕᕆᔨᐅᓂᕐᒧᓪᓗ ᐃᓕᓯᒪᓂᑰᓪᓗᓂ ᐃᖃᓗᖕᓂ ᐃᒡᓗᐃᑦ ᑲᑎᙵᔪᑦ ᑯᐊᐳᕇᓴᖓᓐᓄᑦ 5, ᐃᒃᓯᕙᐅᑕᐅᓂᑰᓪᓗᓂ ᐃᖃᓗᖕᓂ ᑯᐊᑉ ᐃᒡᓗᖁᑎᖏᓐᓄᑦ Hillside Housing Co-op, ᐃᓕᓐᓂᐊᖅᑐᓕᕆᔨᒃᑯᓐᓄᓪᓗ ᐃᒃᓯᕙᐅᑕᐅᓂᑰᓪᓗᓂ, ᐃᓚᒋᔭᐅᓪᓗᓂᓗ ᐃᖃᓗᐃᑦ ᓄᓇᓕᐸᐅᔭᖏᑦᑕ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᕋᓛᖏᓐᓄᑦ.

ᐊᒫᖏᓐᓄᑦ ᑐᙵᓪᓗᓂ, ᐱᑕᓂ ᐱᔪᒥᓇᕈᓱᐃᓐᓇᐸᑦᑐᖅ ᖃᐅᔨᒪᔪᒪᓪᓗᒋᓪᓗ ᐊᑐᖅᓯᒪᔪᑦ ᐅᓪᓗᒥᓕᓴᐅᔪᓪᓗ ᐃᒫᓃᕙᓯᖕᓂᖅᓴᐅᔪᑦ ᒐᕙᒪᖃᕐᕕᐅᔪᑦ. ᐊᓕᐊᓇᐃᒋᔭᓕᒃ ᑲᑎᕈᓘᔭᖅᐸᓐᓂᖅ ᑰᖃᕐᕕᒻᒥ, ᓂᔾᔭᐅᓯᔭᕐᓂᖅ ᐃᙱᖃᑦᑕᕐᓂᕐᓗ, ᑎᓂᓐᓂᓕᐊᕐᓂᖅ, ᐱᓐᓇᕆᓪᓗᓂᐅᒡᓗ ᕿᒻᒥᓂ ᐹᑉᓘ.