ᖁᐊᔭᐅᑎ ᐊᔾᔨᐅᖏᒻᒪᑦ ᐱᕈᖅᑐᖅ ᓇᒥᓕᒫᖅ ᓄᓇᕐᔪᐊᒥ ᑕᑯᔭᐅᔪᓐᓇᓲᖅ, ᑕᒪᒃᑯᓇᙵᑦ ᒥᑭᑦᑑᑎᓂᒃ ᖁᐊᔭᐅᑎᕈᔪᓪᓗ ᑲᑎᑦᑐᒋᑦ ᐱᕈᕈᑎᒋᕙᑦᑕᖓ. ᐱᕈᕈᓐᓇᓲᖑᓪᓗᓂᓗ ᑭᓯᐊᓂ ᓈᒻᒪᑐᐊᕐᒪᑕ ᐊᕙᑖᓃᑦᑐᑦ ᑲᑎᓐᓂᖏᑦ, ᐊᑲᐅᓈᕐᓂᖏᑦ ᐱᕈᕈᓐᓇᕈᑎᒃᓴᖏᑦ.
ᖁᐊᔭᐅᑎᑦ ᓇᒻᒥᓂᖃᖅᑐᑦ ᐱᑕᖃᖅᐳᖅ ᐊᔾᔨᒌᖏᑦᑐᑦ ᑕᒪᒃᑯᐊ ᐱᓕᕆᖃᑎᒌᖕᓂᖏᓐᓄᑦ. ᑖᓐᓇ ᑕᕝᕙ ᐊᔾᔨᐅᔫᑎᒋᕙᐅᒃ ᐱᓕᕆᓂᕆᖃᑦᑕᖅᑕᑦᑕ. ᐱᓕᕆᖃᑎᖃᓕᕌᖓᑦᑕ ᑲᑐᔾᔨᖃᑎᒌᓂᑦ, ᓄᓇᓕᖕᓂ, ᐱᓕᕆᓂᓕᐊᓗᖕᓂᑦ, ᐱᓕᕆᓂᕆᔭᕗᑦ ᐃᑎᔪᒦᑦᑐᓐᓇᖅᑐᖅ ᐊᒻᒪᓗ ᐱᓕᕆᔪᒪᓂᖃᑦᑎᐊᕈᑎᒋᓪᓗᑎᒍᑦ. ᑐᕌᒐᓪᓗᐊᑕᕆᒐᑦᑎᒍᑦ ᓯᓚᕐᔪᐊᖃᑦᑎᐊᕐᓂᖅᓴᐅᔪᒪᓂᖅ, ᑭᓯᐊᓂ ᑕᒪᓐᓇ ᐱᖁᓪᓗᒍ ᑕᐃᒪᙵᓕᒫᖅ ᐆᒃᑐᕋᖃᑦᑕᕐᓗᒍ ᐱᓇᓱᐊᖃᑦᑕᕐᓗᒍᓘᖕᒪᑦ, ᑕᒪᐅᓇ ᖃᓂᑦᑐᒃᑯᑦ ᐅᖓᓯᓈᖅᑐᒃᑯᓘᓐᓃᑦ.
ᐱᓕᕆᐊᑦᑎᓐᓄᑦ ᐱᒻᒪᕆᐅᖕᒪᑦ ᐃᓚᒋᔭᐅᔭᕆᐊᖃᕐᓂᖏᑦ ᐃᓄᐃᑦ, ᓲᖃᐃᒻᒪ ᐃᓄᓗᒃᑖᑦ ᓇᒥᐅᒍᓗᐊᖅᐸᑦ ᓄᓇᖓ, ᑲᑐᔾᔨᖃᑎᒌᖓ, ᑲᑎᙵᓂᖓ ᑐᑭᓯᐅᒪᓂᕐᒥᒃ ᖃᐅᔨᒪᓂᕐᒥᓪᓗ ᐱᔪᐃᓐᓇᐅᔭᕆᐊᖃᓲᖑᖕᒪᑕ. ᖁᐊᔭᐅᑎᑦ ᓇᒻᒥᓂᖃᖅᑐᓄᑦ, ᑐᕌᒐᕆᒐᑦᑎᒍᑦ ᑐᑭᓯᓂᖅ, ᑐᑭᓯᔭᕗᓪᓗ ᐊᐅᓪᓗᑎᓕᕐᓗᒍ ᖃᓄᐃᓕᐅᕐᓂᕐᒧᑦ ᐊᐅᓚᔾᔭᒋᐊᕈᑎᒋᓗᒍ ᒥᒃᓯᖃᖅᑐᒧᑦ. ᑕᐃᒪᐃᑦᑐᓐᓇᖅᐳᒍᑦ ᑭᓯᐊᓂ ᓈᓚᖕᓂᒃᑯᑦ ᐊᒻᒪᓗ ᐅᖃᐅᓯᖃᕐᓂᒃᑯᑦ ᑐᑭᓯᔭᑦᑎᓐᓂᒃ, ᓴᐅᓯᒪᔪᑦ ᓴᐅᓯᒪᔪᓐᓃᖅᑎᓪᓗᒋᑦ ᐊᒻᒪᓗ ᓇᓂᓯᓂᖅ, ᓴᖅᑭᑦᑎᓂᖅ ᓂᐱᓕᐅᕆᓂᕐᓗ, ᐅᒃᐱᕈᓱᑦᑎᐊᕐᓂᕐᒦᓪᓗᑎᒃ ᑭᓯᐊᓂ, ᐃᑲᔪᖅᓱᖅᑕᐅᓂᕐᒥᑦ ᐊᒻᒪᓗ ᑐᓂᓯᓯᒪᑦᑎᐊᕐᓂᕐᒥᑦ (ᐊᐃᑦᑐᖅᓯᔪᒪᓂᖃᑦᑎᐊᕐᓂᕐᒥᑦ).
ᖁᐊᔭᐅᑦ ᓲᖃᐃᒻᒪ ᐱᑐᐃᓐᓇᐅᓗᐊᖏᒻᒪᑦ ᓴᓇᒪᓂᖓᒍᑦ ᑭᓯᐊᓂᓗ ᐱᔭᕆᐊᑭᑦᑐᓂ ᐱᑕᖃᕐᓂᖓ; ᓴᙱᓪᓗᓂ ᓱᖁᓱᓗᐊᓱᐃᑦᑑᓪᓗᓂᓗ, ᑭᓯᐊᓂᓗ ᒪᓕᒃᓴᖅᑕᕈᓐᓇᕆᓪᓗᓂ ᐃᒃᐱᖕᓂᖅᓴᕋᐃᑦᑐᓂᓗ ᐊᕙᑖᓂ. ᑕᒪᒃᑯᐊ ᐱᓕᕆᓂᒃᑯᑦ ᐃᔾᔪᐊᒐᑦᓴᑦᑎᐊᕙᐅᓱᕆᓪᓗᒋᑦ ᑕᐃᒪᐃᑦᑑᓂᕆᔭᖓ, ᖁᐊᔭᐅᑎᑦ ᓇᒻᒥᓂᖁᑎᒋᔭᖅ ᑕᐃᒪᓐᓇ ᐱᓕᕆᔭᒃᓴᒥᓂᒃ ᖃᐅᔨᓴᕐᓂᕐᒦᑲᐃᓐᓇᐸᑦᑐᖅ. ᐊᑲᐅᙱᓕᐅᕈᑎᑦ ᐊᐳᕈᑕᐅᔪᑦ ᓇᑭᓕᒫᖅ ᑕᑯᒋᐊᖅᑳᕐᓗᒋᑦ, ᓴᙱᓂᖃᕈᑕᐅᔪᑦ ᑕᑯᔭᐅᓗᐊᖅᓯᒪᖏᑦᑐᑦ ᐊᑐᖅᑕᐅᔪᓐᓇᖅᑐᓪᓗ ᐱᕕᒃᓴᑦ; ᓇᓂᓯᒍᑦᑕ ᖄᖐᓐᓇᖅᑕᐅᒐᔪᒃᑐᒥᑦ ᑲᔪᓯᒋᐊᑦᑎᐊᕈᑕᐅᔪᓐᓇᖅᑐᒥᑦ, ᓂᕆᐅᒋᔭᐅᖏᒻᒪᕆᑦᑐᒥᓪᓗᖃᐃ, ᓯᕗᒧᒍᑎᒋᓕᖅᑐᒍ.
ᖁᐊᔭᑎᑦ ᐆᒻᒪᕆᖕᒪᑦ ᐊᕗᖔᓘᕈᓐᓇᖅᑐᕐᓗ. ᐊᔾᔨᒌᖏᑦᑐᕈᓘᔮᓘᖕᒪᑕ ᖁᐊᔭᐅᑎᑦ ᓄᓇᕐᔪᐊᕐᒥ, ᑭᓯᐊᓂ ᖃᐅᔨᒪᔭᐅᖏᑦᑐᑦ ᓱᓕ ᐊᒥᓲᖕᒪᑕ. ᑕᐃᒪᙵᑦ ᐊᓯᕈᖅᐸᓪᓕᐊᔪᖅ ᕿᑲᖏᑦᑐᖅ, ᖁᐊᔭᐅᑎ ᐱᕈᖅᐸᓪᓕᐊᖏᓐᓇᖅᑐᖅ, ᓱᑲᑦᑕᖅᑐᓂ, ᒪᓕᒃᐸᓪᓕᐊᖏᓐᓇᖅᑐᖅ ᐊᕙᑎᒥᓂ. ᑕᐃᒫᒃᑕᐅᖅ ᖁᐊᔭᐅᑎᑦ ᓇᒻᒥᓂᖁᑎᒋᔭᖅ ᑕᐃᒪᐃᒃᑭᕗᖅ ᐊᓯᔾᔨᖅᐸᓪᓕᐊᖏᓐᓇᖅᑐᖅ ᑖᓐᓇᓴᐃᓐᓇᐅᖏᓐᓇᕋᓂᓗ. ᖃᐅᔨᒪᔭᐃᓐᓈᓗᒋᖏᓐᓇᑦᑎᒍᑦ, ᐊᑐᐃᓐᓇᐅᓇᓱᒃᐸᐳᒍᑦ ᑭᓯᐊᓂ, ᑭᓇᓕᒫᒧᑦ ᐊᑲᐅᓈᖅᑎᑦᑎᓇᓱᒃᑐᑕ.