ᑕᐃᒃᑯᐊ / ᐊᕐᓇᖅ

ᒪᓚᐃᔭ ᑭᓴ−ᓂᑯᓪᕙᐃᓐ ᐱᔨᑦᑎᕋᓲᖑᔪᖅ ᕿᑎᐊᓃᑦᑐᒥᑦ ᖁᑦᑎᓐᓂᖃᖅᑐᓂ ᖃᐅᔨᓴᖅᑎᐅᓪᓗᓂ ᓚᐃᑲᓐ ᖃᐅᔨᓴᖅᑎᑯᓐᓂ, ᑐᑭᒧᐊᑦᑎᑦᑎᖃᑕᐅᓪᓗᓂ
ᐱᓕᕆᐊᖑᔪᓂᑦ, ᐊᐅᓚᑦᑎᔨᐅᓪᓗᓂ, ᑐᓴᐅᒪᑎᑦᑎᔨᐅᓪᓗᓂ, ᖃᐅᔨᓴᖅᑎᐅᓪᓗᓂ ᐊᒻᒪᓗ ᑎᒥᐅᔫᑦ ᐱᕙᓪᓕᐊᑎᑕᐅᓂᖏᓐᓄᑦ ᐊᒥᓱᑲᓪᓚᓐᓂ
ᓄᓇᓕᓐᓂ ᑐᓐᖓᕕᖃᖅᑐᓂᑦ ᐱᒋᐊᖅᑎᑕᐅᓯᒪᔪᓂᑦ. ᑖᒃᑯᐊ ᐱᓕᕆᓂᖓᑦ ᐃᑲᔪᖅᓰᖃᑦᑕᖅᑐᖅ ᐃᓕᖅᑯᓯᕐᒥᑦ ᑐᓐᖓᕕᖃᖅᑐᓂᑦ ᐱᕙᓪᓕᐊᔾᔪᓯᐅᔪᓂᑦ, ᐊᔾᔨᐅᖏᑦᑐᒃᑯᑦ ᑐᓴᐅᒪᑎᑦᑎᓂᕐᒥᑦ, ᐱᓕᕆᖃᑎᒃᓴᓂᑦ ᐊᖅᑭᒃᓯᓂᕐᒥᑦ, ᓄᓇᓕᓐᓂᑦ ᐊᒻᒪᓗ ᑲᑐᔾᔨᖃᑎᒋᔭᖏᓐᓂᑦ
ᐃᓄᐃᑦ ᓄᓇᓕᒫᖓᓂ.

ᒪᓚᐃᔭ ᐊᑐᖅᐸᑦᑐᖅ ᐊᔾᔨᒌᓐᖏᑦᑐᓂᑦ ᖃᐅᔨᒪᔭᖏᓐᓂᑦ ᐊᒻᒪᓗ ᑲᑐᔾᔨᖃᑎᒌᓐᓂᕐᒨᖓᔪᓂᑦ ᖃᐅᔨᓴᖅᑐᓂ, ᐊᑐᖅᑐᓂ ᐊᑐᓚᐅᖅᓯᒪᔭᖏᓐᓂᑦ ᐃᓄᐃᑦ ᓴᓇᔾᔪᓯᖏᓐᓂᑦ, ᐃᓕᖅᑯᓯᖏᓐᓂᑦ, ᑐᓴᐅᒪᖃᑎᒌᓐᓂᕐᒥᑦ, ᐊᒻᒪᓗ ᓄᓇᓖᑦ ᐱᕙᓪᓕᐊᑎᑕᐅᓂᖏᓐᓂᑦ. ᓴᓐᖏᓂᖏᑦ ᐃᓚᖃᖅᑐᑦ ᓄᓇᓕᓐᓂᑦ ᖃᐅᔨᒋᐊᕈᓐᓇᓂᕐᒥᑦ, ᐃᓕᖅᑯᓯᕐᒧᑦ ᑐᕌᖓᔪᓂᑦ ᐱᓕᕆᑎᑦᑎᓂᕐᒥᑦ, ᑐᑭᒧᐊᑦᑎᑦᑎᓂᒃᑯᑦ ᐃᑲᔪᖅᓰᓂᕐᒥᑦ, ᑐᓴᐅᒪᖃᑎᒌᓐᓂᕐᒧᑦ ᑐᑭᒧᐊᒍᑎᒃᓴᕐᓂᑦ, ᐊᔾᔨᐅᖏᑦᑐᒃᑯᑦ ᐅᓂᒃᑳᖃᑦᑕᓂᕐᒥᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒥᑦ ᑕᑯᔭᒃᓴᐅᔪᓂᑦ ᐊᒻᒪᓗ ᐃᓕᖅᑯᓯᕐᒥᑦ ᓱᕋᐃᓂᐅᓴᓐᖏᑦᑐᓂᑦ ᐊᑐᖃᑦᑕᓂᕐᒥᑦ. ᑕᒪᐅᓇ ᓴᓇᕈᓘᔭᕐᓂᒃᑯᑦ ᐊᒻᒪᓗ ᖃᐅᔨᓴᕐᓂᒃᑯᑦ, ᐊᖏᖅᓯᒪᓂᖃᖅᑐᑦ ᐃᑲᔪᖅᓰᓂᐊᕐᓂᕐᒥᑦ ᐃᓄᐃᑦ ᓇᒻᒥᓂᖅ ᓯᕗᓂᕆᒍᒪᔭᖏᓐᓂᑦ ᓯᕗᓂᖃᕈᓐᓇᖁᓪᓗᒋᑦ, ᓄᓇᓕᓐᓂ ᓂᐱᐅᔪᓂᑦ ᖁᕝᕙᑎᑦᑎᓂᒃᑯᑦ, ᐊᒻᒪᓗ ᐃᑲᔪᖅᓰᓂᒃᑯᑦ ᑲᒪᑦᑎᐊᖅᑐᓂᑦ, ᑕᒪᒃᑮᓐᓄᑦ ᐃᓅᖃᑎᒌᑦᑎᐊᓂᕐᒧᑦ.

ᓴᓂᕌᓂ ᖃᐅᔨᓴᖅᑎᐅᓪᓗᓂ ᐱᓕᕆᓂᖏᓐᓄᑦ, ᒪᓚᐃᔭ ᓱᓕ ᓴᓇᕈᓘᔭᕐᓂᕐᒥᑦ ᑎᒍᒥᐊᖅᐳᖅ ᐊᑖᒍᑦ ᐃᑲᕋᓴᖅ, ᐱᓕᕆᓪᓗᓂ ᓴᐸᖓᓕᕆᓂᕐᒥᑦ, ᐃᓄᐃᑦ ᐃᓕᖅᑐᓯᖏᑎᒍᑦ ᑐᓐᓂᓕᐅᕐᓂᕐᒥᑦ, ᖃᕋᓴᐅᔭᒃᑯᑦ ᓴᓇᕈᓘᔭᕐᓂᕐᒥᑦ, ᐃᓕᖅᑯᓯᕐᒥᑦ ᐊᑐᕐᓂᕐᒥᑦ, ᐊᒻᒪᓗ ᑎᑎᖅᑐᒐᓕᐅᕐᓂᕐᒥᑦ ᐊᒻᒪᓗ ᐃᓕᒍᓂᑦ ᕿᑦᑐᓪᓗᒋᑦ ᓴᓇᓂᕐᒥᑦ. ᑖᒃᑯᐊ ᓴᓇᕈᓘᔭᖃᑦᑕᖅᑐᑎᒃ ᐃᓕᒃᓯᒪᔭᒥᓂᒃ ᐊᑐᖅᑐᑎᒃ ᐃᓚᐅᑎᑦᑎᒋᐊᖃᑦᑕᖅᐳᑦ ᑐᓴᐅᒪᑎᑦᑎᕙᑉᐳᓪᓗ, ᐱᓗᐊᖅᑐᒥ ᐱᓕᕆᓂᐅᔪᓄᑦ ᐱᒋᐊᖅᕕᒥᓂᖃᖅᑐᓄᑦ ᐱᖅᑯᓯᕐᒥᑦ ᑲᔪᓰᓐᓇᕋᓱᑦᑎᑦᑎᓂᕐᒥᑦ, ᐅᓂᒃᑳᑎᑦᑎᓂᕐᒥᑦ, ᐊᒻᒪᓗ ᓄᓇᓖᑦ ᖃᐅᔨᒪᔭᖏᓐᓂᑦ.

ᖄᖓᒍᒃᑲᓐᓂᖅ ᐱᓕᕆᓂᕆᔭᖏᓐᓄᑦ ᓚᐃᑲᓐ ᖃᐅᔨᓴᖅᑎᑯᓐᓄᑦ, ᒪᓚᐃᔭ ᐅᓪᓗᒥᐅᔪᖅ ᐱᔨᑦᑎᖃᑦᑕᖅᑐᑦ ᐊᖏᔪᖅᑳᕆᔭᐅᓪᓗᓂ ᓴᓇᕈᓘᔭᕐᓂᕐᒧᑦ ᐃᓄᑦᓯᐊᕕᒃ ᐅᖃᐅᓯᕐᓄᑦ ᐱᖅᑯᓯᕐᓄᓪᓗ ᑎᒥᖁᑎᖓᓂ ᕼᐆᑉᑕᐃᔪᓪ, ᓄᓇᑦᓯᐅᕗᑦᒥ, ᑕᐃᑲᓂ ᐱᖅᑯᓯᕐᓂᑦ ᐆᒻᒪᐹᓪᓕᑎᑦᑎᓂᕐᒧᑦ ᐱᒋᐊᖅᑎᑕᐅᔪᓂᑦ ᐃᑲᔪᖅᓰᖃᑦᑕᕐᒪᑕ ᑕᒪᐅᓇ ᓴᓇᕈᓘᔭᖅᑎᑦᑎᓂᒃᑯᑦ, ᑐᓴᐅᒪᔾᔪᑎᓕᕆᓂᒃᑯᑦ, ᑐᒃᓯᕋᐅᑎᓂᑦ ᑎᑎᕋᕐᓂᕐᒥᑦ, ᐱᖅᑯᓯᖅᑎᒍᑦ ᑐᓐᓕᓕᐅᕐᓂᕐᒥᑦ, ᐊᒻᒪᓗ ᓄᓇᓕᓐᓄᑦ ᑎᑭᐅᑎᒐᓱᐊᕐᓂᕐᒥᑦ. ᐊᓂᒍᖅᓯᒪᔪᓂ, ᐱᓕᕆᖃᑎᖃᓚᐅᖅᓯᒪᒻᒥᔪᖅ ᖃᒡᒋᐊᕗᑦᑯᓐᓂ! ᓄᓇᕗᒻᒥ ᑕᑯᕋᓐᓈᖅᑕᐅᕕᒻᒥ ᐊᓪᓚᕕᒻᒥ ᐊᒻᒪᓗ ᑐᓴᐅᒪᑎᑦᑎᓂᕐᒧᑦ ᐊᐅᓚᑦᑎᔨᐅᓪᓗᓂ ᐊᒻᒪᓗ ᐊᓪᓚᕝᕕᖓᓂ ᑲᒥᓴᓇᐅᔫᑉ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᓐᓄᑦ ᐊᑦᑎᓂᖅᓴᒥ ᑐᓴᐅᒪᑎᑦᑎᔨᐅᓪᓗᓂ ᐊᒻᒪᓗ ᖃᕋᓴᐅᔭᒃᑯᑦ ᓂᐅᕕᐊᒃᓴᓂᑦ ᓴᖅᑭᔮᖅᑎᑦᑎᓂᕐᒧᑦ ᑐᑭᒧᐊᑦᑎᑦᑎᔨᐅᓪᓗᓂ, ᐱᓕᕆᖃᑕᐅᕙᑦᑐᓂᓗ ᑐᓴᐅᒪᑎᑦᑎᓪᓗᓂ, ᑎᑭᐅᑎᒐᓱᐊᖅᑎᐅᓪᓗᓂ, ᑎᑭᑎᑦᑎᐅᓐᓗᓂ, ᐊᒻᒪᓗ ᖃᕋᓴᐅᔭᒃᑯᑦ ᐅᓂᒃᑳᓕᐊᕐᓂᕐᒧᑦ ᐱᒋᐊᖅᑎᑕᐅᓯᒪᔪᓂ ᑲᓇᑕᓕᒫᒥ. ᑕᐃᑲᓐᖓᑦ 2023-ᒥ 2024-ᒧᑦ, ᒪᓚᐃᔭ ᐱᓕᕆᓚᐅᖅᑐᖅ ᐸᐅᒃᑑᑎᑦ ᐃᓄᐃᑦ ᐊᕐᓇᖏᓐᓂᑦ ᑲᓇᑕᒥ ᖃᐅᔨᒪᔭᐅᔪᓂᑦ ᑐᑭᒧᐊᑦᑎᑦᑎᔨᐅᓪᓗᓂ ᖃᐅᔨᒋᐊᖅᑕ! ᐱᓕᕆᓂᐅᔪᒥ, ᑲᑐᔾᔨᖃᑎᖃᖅᑐᓂ ᐃᓄᓐᓂᑦ ᒪᒃᑯᑦᑐᓂᑦ ᐱᔨᑦᑎᕋᖅᑎᓂᓪᓗ ᓴᓇᓪᓗᑎᒃ ᐱᖅᑯᓯᐅᑉ ᐃᓚᒋᔭᖏᓐᓂᑦ ᐱᔾᔪᑎᖃᖅᑐᓂᑦ ᓄᓕᐊᕐᓂᕐᒥᑦ ᐊᒃᑕᓇᖅᑐᒦᓐᖏᓪᓗᓂ ᐃᓄᐃᑦ ᓄᓇᓕᖏᓐᓄᑦ.

ᐃᓅᔪᒥᓂᐅᓪᓗᓂ ᐃᖃᓗᓐᓂ ᐊᒻᒪᓗ ᐱᕈᖅᓴᔭᒥᓂᐅᓪᓗᓂ ᐱᖓᓱᓂ ᐊᕕᑦᑐᖅᓯᒪᓂᖏᓐᓂ ᓄᓇᕗᒻᒥ, ᒪᓚᐃᔭ ᐱᕈᖅᓴᓚᐅᖅᑐᖅ ᓴᓂᓕᖃᖅᑐᓂ ᒥᖅᓱᖅᑎᓂᑦ ᐊᒻᒪᓗ ᑎᑎᖅᑐᒐᖅᑎᓂᑦ ᐸᓐᓂᖅᑑᒥ ᓄᓇᕗᒻᒥ. ᑕᐃᒃᑯᐊ ᐱᓕᕆᐊᖏᑦ ᒪᓕᑉᐸᒻᒪᑕ ᐃᓚᒌᑦ ᖃᐅᔨᒪᔭᖏᓐᓂᑦ, ᐃᓅᓯᕐᒥ ᐊᑐᖅᓯᒪᔭᖏᓐᓂᑦ, ᐊᒻᒪᓗ ᓴᓐᖏᔪᐊᓗᒻᒥᑦ ᐊᖏᖅᓯᒪᓂᖃᖅᑐᑎᒃ ᐃᑲᔪᖅᓰᒍᒪᓂᕐᒥᑦ ᐱᖅᑯᓰᑦ ᑲᔪᓰᓐᓇᖁᓪᓗᒋᑦ ᐊᒻᒪᓗ ᐊᑑᑎᖃᑦᑎᐊᖅᑐᓂᑦ ᐃᓂᖃᖁᓪᓗᒋᑦ ᐃᓄᐃᑦ ᑕᑯᒃᓴᐅᓂᖏᓐᓄᑦ ᒪᑭᒪᑦᑎᐊᕈᓐᓇᓂᐊᕐᒪᑕ ᐃᓄᐃᑦ ᓄᓇᖓᓂ ᐊᒻᒪᓗ ᐅᖓᑖᓄᑦ.